jeudi 4 décembre 2014

MOBILIZACION! 2EME PROCÈS!

Lo combat n'ei pas acabat!
Recapitulatiu de l'ahar e deu prumèr procès aqui e aqui
Récapitulatif de l'affaire et du premier procès ici et ici

Sosten deu med'òc de Montpelhièr!

Sosten a Libertat! e la Tor deu Borrèu

Lo Med'òc, movement das estudiants d'occitan, sèm una associacion estudianta aubergada a l'Universitat Pau Valèri Montpelhièr III. Despuèi dètz-e-uèch ans nos fasèm amb la sociabilizacion de la lenga occitana en organisant talhièrs, concèrts, repais lingüistics, etc... Ensajam tanben de prepausar la lenga en defòra de l'Universitat, per exemple amb la demanda de bilingüisme Francés/Occitan dins lo tramway. L'objectiu es qu'espeligon d'espacis sociaus que s'i pòsque parlar de tot en occitan e que sigue present l'Occitan dins la vida vidanta das estudiants e dau mond, quotidianament emai publicament.

Per aquò, afirmam lo nòstre sosten al jovent de Libertat que pareguèt au tribunau de Pau lo 17 d'octòbre passat e qu'en s'expriment en Occitan an degut levar la “séance” per abséncia d'un interprèta. Dins la Carta europèa de las lengas regionalas e minoritàrias, que per la ratificar nòstre govèrnament s'es engatjat a modificar la constitucion, s'assegura a l'acusat lo drech a s'exprimir en Occitan, o dins la lenga "regionala" o minoritària que vòugue. Coma que sigue, que l'òm se pòsque exprimir a la justícia dins la lenga que vouguem es, o cal que sigue, un drech das pus elementaris de l'uman en democracia.

Lo Med'òc esperam que l'estat francés intègre la legalitat europèa sus las lengas. Rapelam qu'a l'Universitat se forma d'estudiants a la traduccion, e que crear de pòstes d'interprètas Occitan-Francés dins l'administracion e la justícia, per que la lenga occitana e sos locutors visquem sens discriminacion, es degunament un esfòrç insurmontable per nòstre país.

Que visque la lenga occitana e l'expression liura de totas las lengas en França !

Lo Med'òc dau Clapàs
 
Med'òc Montpelhier
local 101 Maison des étudiants
Université Paul Valery
route de Mende
34000 MONTPELLIER
0467142622
medoc_montpelhier@yahoo.fr